ब्युटी न्युज नेपाल
काठमाडौँ, १३ माघ
चलचित्र ‘आ बाट आमा’का मुख्य कलाकार यति बेला मोफसल यात्रामा छन् । उनीहरु आज मंगलबार चलचित्रको प्रचारका लागि पोखरा पुगेको छन ।
यही माघ १६ गतेबाट प्रदर्शनमा आउने यो चलचित्रको प्रदर्शन मिति नजिकिदै गर्दा प्रचारप्रसारलाई व्यापक बनाउन कलाकार मोफसल यात्रामा लागेका हुन् । पोखरा पुगेका विपना थापा, पल शाह, उषा उप्रेती, सिम्रन पन्त, साइग्रेस पोखरेलकासाथमा फिल्मका कार्यकारी निर्माता करण सिंह रसालीसहित टिमले प्रेसमिट राखेको निर्माता रसालीले बताए ।
उनका अनुसार पोखरामा फिल्मको बारेमा थप जानकारी गराइएको हो । सोमबार मात्रै यो फिल्मलाई केन्दीय चलचित्र जाँच पास समिति (सेन्सर बोर्ड)बाट युनिभर्सल सर्टिफिकेट पाएको थियो।
फिल्मका निर्देशक चन्द्र पन्तले यस फिल्मलाई थप प्रचारप्रसारमा सघाउन भारतबाट आएर अभिनेत्री विपना थापा,अर्का अभिनेता प्रदीप रावतले जोडबल गरिरहेको बताए। विपना र प्रदीपका अलवा नेपालमा रहेका अभिनेता पल शाह,उषा उप्रेती,सिमरन पन्त पनि उतिकै लागेका छन् ।
आर्या इन्टरटेन्मेन्टको प्रस्तुतिमा निर्माण भएको यस फिल्ममा विपना थापा,पल शाह,प्रदीप रावत,उषा उप्रेती, सिम्रन पन्त, साइग्रेस पोखरेल,गजित बिष्ट,बेगम नेपाली लगायत कलाकारको मुख्य भूमिका रहेको छ ।
निर्देशक पन्तकै कथा तथा पटकथा रहेको यस फिल्ममा संगीत कोशिस क्षेत्री र थानेश्वर गौतमको छ । साथै फिल्मको गीतको भिडियोमा कोरियोग्राफी गंभीर बिष्ट र दिलिप ओखेडाको रहेको छ। अभिमन्यू निरवीद्वारा लिखित संवादमा अमर न्यौपाने, अभिमन्यू निरवी र चन्द्र पन्तले सहकार्य गरेको यस फिल्मलाई नवराज उप्रेतीले खिचेका हुन्। फिल्ममा कृष्ण प्रसाद सुवेदी, ओमकार पन्त, प्रकाशजंग कुँवर,ध्रुव प्रसाद न्यौपाने र क्षितिज ढुंगानाको लगानी रहेको छ । यस फिल्मका कार्यकारी निर्माता करण सिंह रसाली हुन् ।
फिल्मको सम्पादन मिलन श्रेष्ठको हो भने ट्रेलर र टिजरको काम साहिल खानले गरेका छन्। फिल्मको वितरण आरआर फिल्म्सले गर्दैछ भने डिजिटल अधिकार ओएसआर डिजिटलको रहेको छ।
स्मरण रहोस्, यस फिल्ममा समावेश गीत लैजा खवर ए हावा र जाँदैछु नौ डाँडा काटेर चर्चा छ।जुन गीतले ३० लाख भन्दा माथी भ्युज कमाई सकेको छ ।
