ब्युटी न्युज नेपाल
बिराटनगर, २६ जेठ
प्रेमिकाको घरमा गएका किशोर झुण्डिएको अवस्थामा मृत फेला परेपछि सिरहाको औरही गाउँपालिका वडा नम्बर –५ मा तनाव सृजना भएको छ । मृतकका आफन्तले आत्महत्या नभएर हत्या हुनसक्ने आरोप लगाएका छन् । स्थानीय १७ वर्षीय अबिरचन यादव आफ्नो प्रेमिकाको घरमा गएराती झुण्डिएको अवस्थामा फेला परेका हुन् । उनी सोही ठाउँमा स्थानीय जोगिन्द्र यादवको घरमा प्रेमिकालाई भेट्न आईतबार राती पुगेका थिए । मृतककी प्रेमिका ती किशोरीले आफू अबिरचन झुण्डिएको घरमा नसुतेको प्रहरी समक्ष बताएकी छन् ।
मृतक अबिरचनका परिवारले भने हत्या गरेर झुण्ड्याएको आरोप लगाएका छन् । मृतक अबिचरनको शव जिल्ला प्रहरी कार्यालय सिरहाको टोलीले कानुनी प्रक्रिया पुर्याएर पोस्टमार्टमका लागि लहान अस्पताल पठाएको छ। घटनाको विषयमा अनुसन्धान थालिएको एसपी उमाप्रसाद चतुर्वेदीले जानकारी दिएका छन् ।
मृतक अबिरचनको नाकबाट रगत बगेको छ। नाकमा चोट लागेकाले रगत बगेको प्रहरीले बताएको छ । नाकको चोट देखेर परिवारले हत्याको शँका गरेका हुन् । आफ्नो छोराको प्रेमको बिरुद्ध केटीको परिवार रहेको पनि मृतकमा परिवारले जनाएका छन् ।
अबिरचन राति करिब १ बजे झुण्डिएको अवस्थामा फेला परेको बताइएको छ । ती किशोरीले आफू ट्वाइलेट गएर फर्किने क्रममा घर उक्त घर पस्दा अबिरचन झुण्डिएको देखेपछि हजुरआमा र बुवालाई जानकारी गराएको बताएकी छन् । स्थानीयका अनुसार अबिरचन र जोगिन्द्रकी छोरीबीच प्रेम सम्बन्ध थियो । अबिरचनले किशोरीलाई विवाहको लागि दबाब दिईरहेको पनि एक स्थानीयले बताएका छन् ।
