ब्युटी न्युज नेपाल
काठमाडौँ १० मंसिर
नेपालकी किशोरी बन्दना नेपालले लगातार १२६ घण्टा नाचेर १२ मंसिरमा गिनिज अफ वल्र्डमा विश्व रेकर्ड कायम गर्दैछिन् । यस अघि भारत, केरलाकी कलामण्डलम हेमलथाले दुई वर्ष १२३ घण्टा क्लासिकल नृत्य गरेर अहिलेसम्मकै सबैभन्दा लामो नृत्य गरी वल्र्ड रेकर्ड बनाएकी थिइन् । त्यही रेकर्ड तोड्न धनकुटाको महालक्ष्मी नगरपालिका–९ मा २०५८ सालमा जन्मिएकी बन्दनाले ७ मंसिर बिहान ९ बजेबाट वल्र्ड रेकर्डका लागि नृत्य सुरु गरेकी हुन् ।
यसरी चार दिनबाट नाचेको नाचै छिन बन्दना (हेर्नुस भिडियो)
काठमाडौँको बत्तिसपुतली स्थित बिग फुडल्यान्डमा उनले नृत्य गरिरहेको ८५ घण्टा नाघिसकेको छ । यही १२ मंसिर बुधबार दिउँसो १ बजेपछिसम्म नाचेर विश्व रेकर्ड कायम गर्दैछिन् ।
बन्दनाका बुबा गायक राम नेपालकाअनुसार अहिलेसम्म उनको नृत्य उत्साहजनक छ । बन्दना नृत्यमा निरन्तर सबैभन्दा बढी समय नाचेर गिजिन अफ वल्र्डमा विश्व रेकर्ड बनाउने कार्यमा नजिक पुगिसकेकी छिन् । प्रत्येक घण्टामा पाँच मिनेट मात्र खानपिन र सौचका लागि समय पाउने गरेकी उनले दिनरात नभनी निरन्तर नृत्य गरिरहेकी छिन् । बुबा राम नेपालले छोरी नाचिरहेको कार्यक्रममा सहभागी भएर हौसला दिन र बन्दनालाई विश्व रेकर्ड कायम गर्दै देशको नाम उच्च बनाउन सबैलाई अनुरोध गरेका छन् ।
