ब्युटी न्युज नेपाल
काठमाडौँ, २ भदौ
नायिका निरुता सिंह र रेखा थापा २० वर्षपछि पर्दामा सँगै प्रस्तुत हुँदैछन् । यस अघि यी दुई अभिनेत्रीले २०६२ सालमा चलचित्र दुई पलमा सँगै काम गरेका थिए । अहिले निरुतालाई रेखाले आफ्नो नयाँ चलचित्र ३६ को आँकडामा शीर्ष मध्य एक भूमिकामा अनुबन्धित गरेकी छिन् ।
सविर श्रेष्ठको निर्देशनमा तयार हुन लागेको चलचित्र ‘३६ को आँकडा’मा अभिनय गर्नका लागि नायिका निरुता सिंह नेपाल आइपुगेकी छिन् । मुम्बइबाट आइतबार राती नेपाल आएकी निरुताले पत्रकारहरुसँग कुरा गर्दै आफू अत्यन्तै उत्साहित रहेको बताइन् ।
निरुताले भनिन्,‘अब म कही पनि जादिनँ । म निरन्तर नेपाली फिल्ममा काम गर्छु । बिचमा मलाई कोरोना भयो । त्यसकारण, मैले फिल्ममा काम गर्न पाइनँ । अब भने म कही पनि जान्नँ ।’
निरुताले आफू नेपाली फिल्म भन्दा टाढा बस्न नसक्ने स्पष्ट पारिन् । बिचमा केही फिल्मबाट अफर आएपनि विभिन्न कुराहरु नमिलेर काम गर्न नपाएको उनले बताइन् ।
यो फिल्ममा निरुताको भूमिका के हो भन्ने खुलेको छैन । निर्देशक सविर श्रेष्ठले पनि निरुताको भूमिका अहिले नै खुलाउन नमिल्ने सुनाए ।
निरुतालाई फिल्ममा लिनुको कारणबारे सविर भन्छन्–‘मैले सहायक निर्देशकको रुपमा निरुता दिदीसँग केही फिल्ममा काम गरेको थिएँ । तर, निर्देशक भएपछि काम गर्न पाएको थिइनँ । कुनै कुनै भूमिकामा विशेष कोही कलाकारको मात्र आवश्यकता पर्ने रहेछ । यो फिल्ममा पनि निरुता दिदी नै चाहिने भूमिका छ । यसैले, उहाँलाई हामीले आग्रह गरेका हौं ।’
यो फिल्ममा रेखा थापा, पूजा शर्मा, महेश त्रिपाठी, पुष्प खड्का लगायतका कलाकारहरुको पनि अभिनय छ । नायिका सिंहले फिल्म क्याप्टेन र दाल भात तरकारीमा ६ वर्ष अघि काम गरेकी थिईन् । त्यस पछि नयाँ फिल्ममा उनले काम गरेकी छैनन् । अब भने उनी आजबाट छायांकनमा जान लागेको फिल्म ‘३६ को आँकडा’मा काम गर्न तयारी भएकी छिन् ।
