ब्युटी न्युज नेपाल
काठमाडौँ, ३२ असार
चलचित्र सिटामोल आगामी २३ साउनबाट नेपालमा प्रदर्शनमा आउने भएको छ । चलचित्रको रिलिज मिति नजिकिँदै गर्दा सिटामोलको दोस्रो गीत ’मुटुभित्र खिल छ हजुर..’को भिडियो बुधबार बेलुका सार्वजनिक गरियो ।
यो गीतमा सिनेमाका मुख्य कलाकार सौगात मल्ल, बेनिशा हमाल छन् । उनीहरु यसमा दम्पत्तिको रुपमा रहेका छन् । बाबुल गिरीको स्वर संगीत रहेको यो गीतलाई गोविन्द भट्टले लेखेका हुन् ।
चलचित्रको यस अघि टिजर सार्वजनिक भईसकेको छ । टिजरले चर्चा पाएको छ । चलचित्रको ट्रेलर चाँडै सार्वजनिक गरिने निर्माण पक्षले जनाएको छ ।
निर्माता तथा निर्देशकले ’सिटामोल’ मार्फत् बिम्बात्मक नेपाल र आम नेपालीको जनजीवन र परापुर्वकालदेखि नेपाली समाजमा जरा गाड्दै आएको कुसंस्कारलाई चिरफार गर्न खोजेको छन् । सिनेमाले त्यही समस्याको उठानसहित दर्शकको मन जित्ने सिनेमा निर्माण गरेको भनाई निर्देशक तथा निर्माताको रहेको छ ।
राज बहादुर साने निर्देशित सिनेमामा सौगात र बेनिशासहित श्री कृष्ण निरौला, जानुका विश्वकर्मा, लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल र बालकलाकार करण नेपाली, आराध्या राज्यलक्ष्मी डिसीको अभिनय छ । श्री कृष्ण र जानुकाले यही सिनेमाबाट नेपाली रजतपटमा डेव्यु गरेका हुन् ।
तुल्सी देवी फिल्म प्रालीले जुनतारा फिल्मस्को सहकार्यमा निर्माण भएको सिनेमाको कथा प्रदीप भारद्धाज र निर्देशक सानेले लेखेका हुन् । सिमोस सुनुवारको प्रस्तुती रहेको सिनेमामा भुगोल कुमार कार्की र विकाश राज जोशी निर्माता तथा अप्सरा नेपाली, अजय मल्ल र कुमार केसी कार्यकारी निर्माता अनि गंगाराम श्रेष्ठ सह–निर्मातामा छन् ।
सिटामोललाई दिव्य सुवेदीले खिचेका हुन् । कविराज गहतराजको कोरियोग्राफी, बन्दे प्रसादको सम्पादन, डिआई कलर राजेन्द्र मोक्तान, साउण्ड डिजाइनर मुकेश शाह, द्धन्द्व निर्देशन देव महर्जन र शंकर महर्जन, राकेश दाहालको पोस्टर डिजाइन, प्रोडक्सन म्यानेजर विकास तामाङ र धनबहादुर राई रहेको छ ।
