ब्युटी न्युज नेपाल
काठमाडौं १३ फागुन
आगामी १० जेठमा रिलिज गर्ने घोषणा सहित चलचित्र ‘साईनो‘ को पहिलो गीत मायालूलाई जात्रैमै भिडियो…को भिडियो सोमबार काठमाडौंमा एक समारोहबीच सार्वजनिक गरिएको छ । यो चलचित्रलाई नेपाली चलचित्रकी प्रथम नायिका भूवन थापा चन्दले निर्माण गरेकी हुन् । चलचित्रमा कार्यकारी निर्माता शरण थापा रहेका छन् ।
यो गीतको भिडियोमा अभिनेत्री मिरुना मगर र नव अभिनेता राजकुमारको लोक शैलीको रमाईलो नृत्य छ । यो गीतको रचना बरिष्ट गीतकार एवम् चलचित्र निर्देशक चेतन कार्कीले गरेका हुन् । जसमा संगीत बसन्त सापकोटाले भरेका छन् । यो गीतमा मेलिना राई र प्रताप दासको स्वर रहेको छ । गीतको रामजी लामिछानेले कोरियोग्राफी गरेका छन् ।
यो चलचित्रलाई रमेश थापाले निर्देशन गरेका हुन् । साईनोमा अभिमन्यु ‘ निरवी‘ र निर्देशक थापाको लेखन छ । यसको छायांकन रामेश्वोर कार्कीको, सम्पादन बनिश शाहको रहेको छ ।
पारिवारिक प्रेम कथामा तयार भएको चलचित्र ‘साईनोमा कलाकारहरु भूवन चन्द, बसुन्धरा भुषाल, मदनदास श्रेष्ठ, नीता ढुंगाना, मिरुना मगर, शिखा तामाङ, राजा राजेन्द्र पोखरेल र नव नायकमा राज कुमार रहेका छन् ।
