ब्युटी न्युज नेपाल
काठमाडौं १० माघ
चलचित्र गरुड पुराणको नाममाथि केही धार्मिक संस्थाले विरोध जनाएपछि निर्माण पक्षले यो फिल्मको नाम डिजिटल भर्सन (युट्युव) रिलिजमा केही परिर्वतन गर्ने भएको छ । धार्मिक ग्रन्थ गरुड पुराणको नाममा फिल्म बनाएको भन्दै सो नामको प्रयोग रोक्न दवाव दिँदै आएका थिए । उनीहरुले फिल्मको पोष्टर च्यात्ने लगायत विभिन्न दवाव दिँदै आएका थिए ।
बिहिबार निर्माण संस्था अजित फिल्म्स प्रा.लि. र केही धार्मिक संस्थाबीच भएको सहमतिपछि आगामी दिनमा नाम परिवर्तन हुनसक्ने यसका निर्माता सुसन प्रजापतिले जानकारी गराएका हुन् ।
बिहिबारसाँझ निर्माता प्रजापति र निर्देशक सुवास कोईरालाले एक विज्ञप्ति जारी गर्दै यो कुरा जानकारी गराएका हुन् । बिज्ञप्तिमा यस्तो देखिएको छ, ‘यस अजित फिल्म्स प्रा.लि. को ब्यानरमा निर्मित चलचित्र ‘गरुड पुराण’ को नामको विषयमा केही ब्यक्ति र संस्थाहरुले आबाज उठाएर आपत्ति जनाएकोमा हाम्रो ध्यानाकर्षण भएको छ । हिन्दु जागरण नेपाल, विश्व हिन्दु युवा संघ, अन्तराष्ट्रिय समिति लगायतले यो नाम प्रति आपत्ति जनाएको जानकारी हामीले पायौं । अत ः हामी हिन्दु सनातन धर्मावलम्बी भएको र आफ्नो धर्मको संरक्षण प्रति हामी जिम्मेवार भएकाले हामीले निर्माण गरेको चलचित्र गरुण पुराण भित्र धर्मलाई आँच आउने कुनै पनि विषयबस्तु नराखिएको जानकारी गराउँद छौं । साथै केन्द्रिय चलचित्र जाँच समितिले समेत नियम अनुसार हाम्रो सिनेमा हेरेर जाँच पास गरी प्रदर्शनीको लागि अनुमति दिएकाले सो अनुमति बमोजिम एक सातादेखि चलचित्र प्रदर्शन गरिएको जानकारी गराउँद छौं । हामीले गरुड भन्ने ब्यान्डको चर्चा अर्थात (पुराण)मा आधारित यो फिल्म बनाएकाले यसको नाम गरुड पुराण राखिएको पनि जानकारी गराउँद छौं । साथै हामीले राखेको नामबाट उहाँहरुलाई आँच पुगेकोमा हामी क्षमापार्थी छौं । आउँदा दिनमा यो नाम र यस्तो बिषयमा हामी गम्भिर रहने तथा अब उपरान्त चलचित्र गरुड पुराणको थप सामग्रीहरु युट्युव र अन्य सामाजिक संजालमा प्रदर्शन गर्दा चलचित्रको नाम परिवर्तन गरेर सार्वजनिक गर्ने प्रदिवद्दता ब्यक्त गर्दछौं ।’
यसरी फिल्मको नाममा परिवर्तन गर्ने भन्दै यी दुईले विज्ञप्ति जारी गरेका छन् । गत ४ माघबाट रिलिज भएको यो फिल्म शुक्रबारबाट दोस्रो सातामा रिलिज हुँदैछ । दोस्रो साता पनि काठमाडौं र मोफसल गरेर तीन दर्जन भन्दा बढी हलमा गरुड पुराण प्रदर्शन भईरहेको पनि निर्देशक कोईरालाले जानकारी गराए ।
यो चलचित्रमा नाजिर हुसेन, कर्मा, कामेश्वर चौरसिया, प्रविण खतिवडा, प्रियँका सिंह, कमल देवकोटा, लुनिभा तुलाधर, प्रकाश घिमिरेसहितको अभिनय छ ।
