ब्युटी न्युज नेपाल
काठमाडौं, ११ पुष
इभेन्ट बेटर ग्यालेक्सीले क्रिसमस २०१८ को अबसर पारेर ललितपुरको होटल समिटमा आयोजना गरेको ‘क्रिसमस फेसन पार्टी’ आयोजना गर्यो । सोमबार साँझ भएको फेशन शोमा ७ बजेबाट राति ११ बजेसम्म मोडलहरू विभिन्न फेशनमा र्याम्पमा उत्रिए ।
इभेन्ट बेटर ग्यालेक्सीको यो सातौं क्रिसमस फेशन पार्टी हो । फेसन सोमा मोडल मुन शेर्पा, सञ्जिता राउत, प्रशिष्मा बुढाथोकी, सितु महर्जन, सिर्जना गौतम, अजु राई, सोना तामाङ, सुमन पौडेल, रविना खर्वुजा, बिनी लामा र एलिजा क्षत्री र्याम्पमा उत्रिएका थिए ।
काठमाडौंको डिल्लीबजारमा रहेको क्लोज सेट नेपालद्धारा तयार गरिएका टप्स, स्कर्ट, हाफपाइन्ट, सर्ट, जिन्सजस्ता विभिन्न समर फेशनको प्रस्तुतिसँगै फेशन शो सुरु भयो । यसरी पुषको जाडोलाई चुनौती दिँदै विभिन्न गर्मी पहिरनमा युवती सो को पहिलो सिक्वेन्समा र्याम्पमा उत्रँदा त्यहाँको माहोल फरक बनेको हो ।
दोस्रो सिक्वेन्स पार्टी गाउनको थियो । दुर्गा कलेक्सन भक्तपुरले तयार गरेको पार्टी गाउनअन्तर्गत विभिन्न प्रकारका गाउनमा मोडलहरू र्याम्पमा उत्रिए । तेस्रो सिक्वेन्स वान पिसको थियो । पेज थ्रि फेसनले तयार गरेको यो सिक्वेनमा सबै जसो मोडलहरूले वान पिस प्रस्तुत गर्दै फेसन सो गरे ।
चौथो सिक्वेन्स पस्मिनामय बन्यो । रातको करिब १० बजे यो सिक्वेन्समा पस्मिनाको पहिरनमा र्याम्पमा उत्रँदा मोडलहरूले केही न्यायोको महसुस गरे । यो सिक्वेन्समा पस्मिनाको लङ गाउन, सर्ट गाउन, वान पिसलगायतका पहिरन उनीहरूले र्याम्पमा प्रस्तुत गरे । पस्मिना नेपालले तयार परेको पस्मिना पहिरन यो सिक्वेन्समा प्रस्तुत गरिएको थियो ।
जारी रहेको मध्य जाडो र त्यसपछि आउने गर्मीका पहिरनलाई लक्षित गरेर क्रिसमसको इभमा आफूहरूले विगत सात वर्षदेखि फेसन सो गर्दै आएको आयोजक संस्था इभेन्ट बेटल ग्यालेक्सीका अध्यक्ष धिरज तण्डुकारले बताए ।
युवा पुस्तासँगै बालबालिकाको पनि केही फेसन सिक्वेन्स राखिएको थियो । लिटिल प्रिन्स र प्रिन्सस प्रतियोगिता हुन लागेकाले बालबालिकालाई पनि फेसन सोमा उतारिएको कार्यक्रम निर्देशक अभिमन्यु शर्माले बताए । क्रिस्मस फेसन सोको कोरियोग्राफी यसस्था जोशी र सानियाँ खड्कीले गरेका हुन् ।
गायक आनन्द कार्कीले वनमा फुल्यो फूल..सहित आफ्ना आधा दर्जन गीत गाएर कार्यक्रमलाई थप संगीतमय तुल्याएका थिए । डान्सर मनीषा सापकोटा, कलाकार याङसु श्रेष्ठ र क्रिस्टिना खड्काले प्रस्तुत गरेको आकर्षक नृत्यले फेसन सोको रौनक बढाएको थियो । रोजिन शाक्यले फेसन सोलाई सञ्चालन गरेका थिए ।
