व्युटी न्युज नेपाल
काठमाडौं २५ कात्तिक
अमेरिकामा १३ अक्टोबरमा केसी डान्स सेन्टरले आयोजना गरेको कलिउड नाइट २०१८ बाट उठेको रकम चेपाङ बालबालिकाको शिक्षाका लागि प्रदान गरिएको छ ।
अभिनेता सरोज खनालले आइतबार एक कार्यक्रमको बीच चितवनको रत्ननगरमा रहेको गामबेशीको चेपाङ संरक्षण केन्द्रलाई सो एक लाख एकाउन्न हजार एकसय एकाउन्न रुपैयाको चेक हस्तान्तरण गरे । सो रकमको चेक गामबेशीको चेपाङ संरक्षण केन्द्र अध्यक्ष केपी किरण शर्मालाई प्रदान गरिएको छ ।
कार्यक्रमबाट संकलन भएको ७ सय ११ अमेरिकन डलरमा महेन्द्र कुँवरले ५ सय डलर र श्याम बजिमायाले १०१ डलर थपी एक लाख एकाउन्न हजार एकसय एकाउन्न रुपैया नेपाल पठाएका हुन् ।
रकम हस्तान्तरण कार्यक्रममा बोल्दै अभिनेता सरोज खनालले दशैंमा अमेरिका गएको बेला त्यहाँ गरिएको सांस्कृति कार्यक्रमबाट उठेको पैसा केसी डान्स सेन्टरका संस्थापक द्वय नविन केसी र लुना श्रेष्ठ मार्फत आफुले यस केन्द्रमा सहयोग स्वरुप प्रदान गरेको बताए । उनले यो रकम गामबेशीको चेपाङ संरक्षण केन्द्रलाई सहयोग गर्न पाउँदा खुसी लागेको छ भने । अभिनेता खनालले चेपाङ्ग बालबालिकालाई पढेर ठुलो मान्छे बन्नु पर्छ भन्दै शिक्षा भन्दा ठुलो केहि नहुने बताए । यस केन्द्रले चेपाङ्ग बालबालिकालाई शिक्षा दिएकोमा केन्द्र सञ्चालकलाई उनले धन्यबाद दिए ।
गामबेशीको चेपाङ संरक्षण केन्द्र अध्यक्ष केपी किरण शर्माले यसरी नै विभिन्न व्यक्तिको सहयोबाट केन्द्रले शिक्षामा योगदान दिन सकेको बताए । केन्द्रले अहिले १३२ जना चेपाङ्ग बालबालिकालाई शिक्षा तथा बस्न खानको सम्पूर्ण व्यवस्था गरेको र केन्द्रबाट करिब ४ सय भन्दा बढी चेपाङ्ग बालबालिकालाई शिक्षा दिएको जानकारी गराए ।
