व्युटी न्युज नेपाल
काठमाडौं, ३१ भाद्र
काठमाडौंमा एक समारोहबीच खालिङ राई भाषाका बाल गीतहरुको संग्रह ‘रोख्तोकोम्’ (इन्द्रेणी) बिमोचन गरिएको छ । पेन ड्राइभ तथा सिडीमा तयार पारिएको यो संग्रहलाई संगीतकार शान्तिराम राई, किरात खालिङ राई उत्थान संघका अध्यक्ष अर्जुन खालिङ राई, माप्य दुधकोशी गाउँ पालिकाका प्रमुख बुद्धिकिरण खालिङ राई सहितका व्यक्तिले संयुक्त रुपमा बिमोचन गरे ।
किरात खालिङ राई उत्थान संघ केन्द्रिय कार्यसमिति, काठमाडौंले आयोजना गरेको सांगीतिक समारोहमा विमोचित एल्बमका गीतका झलकहरु समेत प्रस्तुत गरिएको थियो ।
अमेरिकामा रहेका संगीतकार पविधन खालिङको शब्द तथा संगीतमा उक्त एल्बममा सात वटा गीत तथा चार वटा ट्रयाक समावेश छन् । आफ्नो जाती र राष्ट्रको स्वाभिमान र अस्तित्व बचाउने यो यूगमा जन्मिएका सम्पूर्ण नानीहरुमा समर्पित’ भनिएको सो एल्बमका रोक्तोकोम्, छ्याम्पुलेम्, झुङ् कैल्य, कम्बी उङ् आदि बोलका गीतहरु समावेश छन् ।
अमेरिकामै सञ्चालनमा रहेको सुर रेकर्डिङ स्टुडियोमा रेकर्ड गरिएका एल्बमका गीतहरुमा संगीतकार खालिङले नै संगीत संयोजन गरेका छन् । एल्बमका गीतमा प्रियंका खालिङ राई, यसोदा खालिङ राई, प्रतिक खालिङ राई तथा पविधन खालिङ राईको स्वर छ ।
