व्युटी न्युज नेपाल
काठमाडौं ३१ असार
प्रचार प्रसारको लागि चार दिन देखि मोफसल यात्रामा रहेकोे चलचित्र ‘चीँ मुसी चीँ’ले शनिबार साँझ नारायणघाटको नारायणीनदी किनारमा भव्य कन्सर्ट गरेको छ ।
वर्षाको बेवास्ता गर्दै विभिन्न सहरमा कन्सर्टपछि त्यहाँ कार्यक्रम गरिएको हो । नारायणघाटमा सो चलचित्रकी अभिनेत्री अलिशा शर्माको कामुक नृत्यले दर्शकहरु मन्त्रमुग्ध भए । यो कन्सर्ट त्यहाँ हजारौंले हेरे ।
पूर्वी नेपालको बिर्तामोडबाट यसले आफ्नो कन्सर्ट सुरु गरेको हो । बिर्तामोडपछि कन्सर्ट धरान, हरिवन, हेटौंडा हुँदै नारायणघाट आएको हो । यी पाँच सहरमा यो चलचित्रको टिमले दर्शकलाई कन्सर्टमार्फत नचाएको छ । सो क्रममा यो चलचित्र ११ साउनबाट देशव्यापी रिलिज हुने जानकारी पनि दर्शकलाई दिईयो ।
यी सहरमा चीँ मुसी चीँका कलाकारले नृत्य एवं गायन प्रस्तुत गरेको यसका निर्देशक दिनेश श्रेष्ठले जानकारी गराएका छन् । चलचित्रको प्रचारका लागि आयोजित कार्यक्रम कन्सर्टभन्दा उत्कृष्ट भएको प्रतिक्रिया पाएको निर्देशक दिनेशको कथन छ ।
अभिनेता सुनिल क्षत्री र अलिशा शर्माको दमदार नृत्यसँगै दर्शकलाई नेपाल आइडलकी उत्कृष्ट पाँच प्रतियोगी सुजाता पाण्डेले गाएको चीँ मुसी चीँको गीतले थप मनोरञ्जन दिइरहेको थियो । अभिनेता सुशान्त कार्कीको नृत्य पनि निकै आकर्षक छ ।
चलचित्र टिमले देशैभर प्रमोसनल कन्सर्ट गर्ने निर्देशक दिनेश श्रेष्ठले बताए । यो टिमले अब बुटवल, भैरहवा, पोखरा, दमौली, काठमाडौंमा पनि कन्सर्ट गर्दै छ ।
अरुणकुमार गुरुङ, महेश्वर खत्री, सुवास भुर्तेल, डबबहादुर गुरुङ निर्माता रहेको यस फिल्मका कार्यकारी निर्मातामा शिवराज कार्की हुन् । यसमा अनिल पाण्डे र प्रिन्स युवराज कार्की प्रस्तुतकर्ताका रूपमा छन् ।
चीँ मुसी चीँमा सुनिल क्षत्री, सुशान्त कार्की, अलिशा शर्मा, शिवराज कार्की, शेखर अधिकारी, कमली वाइवा, शशांक बस्याललगायतका कलाकारको अभिनय छ ।
यो चलचित्रमा सुनिल क्षेत्री र विक्रम स्वाँरको कोरियोग्राफी, बासु न्यौपानेको छायांकन, भूपेन्द्र अधिकारीको सम्पादन रहेको छ ।
