ब्युटी न्युज नेपाल
काठमाडौँ, ११ फागुन
चैत्र २७ गतेदेखि प्रदर्शनमा आउन लागेको फिल्म ‘राम नाम सत्य’ले पहिलो गीत सार्वजनिक गर्दै प्रचार अभियान सुरु गरेको छ । ‘धागोले बाटेको’ बोलको रोमान्टिक गीत सार्वजनिक भएसँगै निर्माण टिमले फिल्मको औपचारिक प्रचार आरम्भ गरेको हो । सार्वजनिक गीतमा रचना रिमालसँगै अर्का गायकको स्वर सुन्न सकिन्छ । यस गीतमा फिल्मका मुख्य कलाकार विराज भट्ट र सुपुष्पा भट्ट फिचरिङमा देखिएका छन् ।
‘पर्दा पछाडिको पर्दा’ थिममा निर्माण गरिएको फिल्म एक्सन, सस्पेन्स र प्रेमकथामा आधारित छ । फिल्ममा विराज भट्ट र सुपुष्पा भट्टका साथै सुशील श्रेष्ठ, दिव्या रायमाझी, आयुष सिंह ठकुरी, प्रशान्त ताम्राकार, सुनिल थापालगायत कलाकारहरुको अभिनय रहेको छ ।
राम नाम सत्य लाई माइकल चन्दले निर्देशन गरेका हुन् । माइकल इन्टरटेन्मेन्ट हाउसको व्यानरमा निर्माण भएको यस फिल्ममा उपेन्द्र शाही र स्वेता बिमलीको लगानी रहेको छ । किशोर भट्ट, राजेन्द्र भट्ट र अर्जुन सुनार कार्यकारी निर्माता हुन् भने मोती कार्की क्रियटिभ प्रोड्यूसरका रूपमा रहेका छन् । लाइन प्रोड्यूसर राजेन्द्र आचार्य हुन् ।
फिल्ममा अर्जुन पोखरेल, एसडी योगी र नवा अन्सारीको संगीत रहेको छ । माइकल चन्दकै कथा तथा पटकथा रहेको फिल्ममा मानकृष्ण महर्जन डीओपी, श्री श्रेष्ठ एक्सन निर्देशक, बन्दे प्रसाद सम्पादक र काला चरण व्याकग्राउन्ड म्युजिकमा छन् ।
सियोन श्रेष्ठको कोरियोग्राफी, राजेन्द्र मोक्तानको कलर तथा नवराज शर्माको मुख्य निर्देशन रहेको फिल्मको टिजर र ट्रेलर साहिल खानले तयार पारेका हुन् । स्क्रिप्ट सल्लाहकारमा अभिमन्यु निरवी र समय थपलिया रहेका छन् ।
