ब्युटी न्युज नेपाल
काठमाडौँ, २२ मंसिर
नृत्यका पारखीहरुको लागि आफ्नो कला प्रस्तुत गर्दै नगद पुरस्कार ट्रफी समेत जित्नको लागि सुनौलो अवसर स्वरुप ‘नृत्य नेपाली पारा’को दोस्रो संस्करणको आयोजना हुने भएको छ । आइतबार काठमाडौंमा पत्रकार सम्मेलन कार्यक्रम गर्दै यो प्रतियोगिताको औपचारिक घोषणा गरिएको हो ।
आयोजक संस्था नेपाल लोक नृत्य सेन्टरका अध्यक्ष केशव कोइरालाले प्रतियोगिताको विस्तृत जानकारी प्रस्तुत गर्नुभएको थियो । कोइरालाका अनुसार प्रतियोगिता दुई तहमा सञ्चालन हुनेछ । जुनियर समूहमा कक्षा २ देखि ५ सम्मका विद्यार्थी र सिनियरमा समूहमा कक्षा ६ देखि १० सम्मका विद्यार्थीले प्रतिस्पर्धा गर्नेछन् । प्रतियोगितालाई नृत्य नेपाल संघले सहकार्य गरेको छ ।
प्रतियोगिताको वर्कसप दस्तुर तीन हजार ५०० रुपैयाँ तोकिएको छ । आवेदन फारम दर्ता शुल्क ५०० रुपैयाँ रहनेछ । वर्कसपपछि सहभागीको फोटोशुट पनि गरिने आयोजकले जनाएको छ । प्रतियोगितामा सहभागी विद्यार्थीले आवश्यक सामग्री स्वयं व्यवस्था गर्नुपर्नेछ । उनीहरूले नेपाली गीतमा मात्र प्रस्तुति दिन पाउनेछन् । प्रतियोगिताका विजेतालाई आकर्षक पुरस्कारको व्यवस्था गरिएको छ । प्रथम पुरस्कारमा २० हजार रुपैयाँ, दोस्रोमा १० हजार, तेस्रोमा सात हजार, चौथोमा पाँच हजार र पाँचौं पुरस्कारस्वरूप पाँच हजार रुपैयाँसहित ट्रफी, मेडल र प्रमाणपत्र प्रदान गरिनेछ ।
यसको साथै उत्कृष्ट हाउभाउ, भेषभूषा, मौलिकता, दर्शकको रोजाइ र उत्कृष्ट प्रस्तुति गरी पाँच विशेष विधामा पनि ट्रफी, मेडल र प्रमाणपत्रसहित सम्मान गरिने जनाइएको छ । आयोजकले ‘नृत्य नेपाली पारा’लाई बालबालिकाको प्रतिभा अभिव्यक्तिको मञ्चका रूपमा प्रभावकारी रूपमा अघि ल्याइने विश्वास व्यक्त गरेका छन् ।
नृत्य निर्देशक संघ नेपालका केन्द्रीय अध्यक्ष तथा वरिष्ठ नृत्य निर्देशक भुवनदास श्रेष्ठको प्रमुख आतिथ्यता र एभरेट नेपाल कल्चर ग्रुपका अध्यक्ष आरसी कोइरालाको विशेष आतिथ्यतामा पत्रकार भेटघाट कार्यक्रम भएको थियो ।
प्रतियोगिताको मुख्य निर्णयकमा शम्भु शाही छन भने अन्य निर्णयकमा कृष्ण रसाल, अनिता गोले तामाङ, रमेश बुढाथोकी रहेका छन् । अडिसन राउण्डबाट छनोट भएका दुईवटै क्याटेगोरीका विद्यार्थीलाई नृत्य कार्यशाला (वर्कसप) गराइनेछ । जसको प्रशिक्षकमा दक्षिणा लामा दावा, सरोज श्रेष्ठ र अभि वाग्ले हुने छन् ।
कार्यक्रममा निर्देशक कृष्ण रसाल, रमेश बुढाथोकी, शम्भु शाही, सुनिल गिरी, अजय विष्ट, सरोज श्रेष्ठ, रिषिकेश श्रेष्ठ, रमेश पाठक, शिला गजुरेललगायतले प्रतियोगिताको सफलताको शुभकामना व्यक्त गरेका थिए ।
