ब्युटी न्युज नेपाल
काठमाडौँ, १५ मंसिर
नेपाली चलचित्र ‘पिआर’यहि मंसिर २६ गतेबाट प्रदर्शनमा आउन भएपछि यसको प्रचारका लागि अष्ट्रेलियामा बसोबास गर्दै आएका यस फिल्मका नायक आर ए सुरज पौडेल र नायिका विनिता कार्की काठमाडौँ आएका छन् । एक साताअघि अष्ट्रेलिया पुगेका निर्देशक शोभित बस्नेतले फिल्मकालाई यी नायक नायिकालाई लिएर नेपाल फर्किएका हुन् । आइतबार साँझ अन्तराष्ट्रिय विमानस्थलमा ओर्लिएका निर्देशक बस्नेतले फिल्मलाई थप उचाईमा पुर्याउनका लागि नायक नायिकालाई लिएर अष्ट्रेलियाबाट नेपाल फर्किएको बताए ।
उनीहरु सोमबार चलचित्र अभिमन्यु च्याप्टर वानको प्रिमियरमा विशेष अतिथिका रुपमा प्रस्तुत भए । कार्यक्रममा पत्रकारसँग कुरा गर्दै सोभितले फिल्मका नायक सुरज पौडेल र नायिका विपिता कार्कीलाई नेपाल लिएर आएपछि अब थप प्रमोसनमा खटिने बताए ।
नेपाल फर्किए लगत्तै उनीहरु अब फिल्म प्रचारप्रसारमा जुटेका छन् । उनीहरुले अभिमन्युको प्रिमियरमा पनि चलचित्र पिआरको खुलेर चर्चा गरे ।
‘फिल्मलाई दर्शकमाझ पुर्याउन कलाकारको पनि ठुलो हात हुन्छ,’निर्देशक बस्नेतले भने,‘अब नायक नायिकालाई नै लिएर नेपाल फर्किएको छु। अब व्यापक रुपमा लागिन्छ।’
निर्देशक बस्नेत एक साताअघि अष्ट्रेलिया लगायतका देशमा फिल्म रिलिजको समय मिलाउन,त्यसतर्फ लागेका थिए। फिल्मका नायक पौडेलले पनि फिल्मको प्रचारका लागि नेपाल आएको बताए।
‘फिल्मको कलाकार खोजि भइरहेको हामीले अष्ट्रेलियामा पनि सुनेका थियौँ,’उनले भने,‘त्यो खोजीले हामीलाई नेपालसम्म तानेको हो।’
यसै फिल्मकी नायिका कार्कीले पनि फिल्मको प्रचार र यहाँका दर्शकसँग भेटघाटका लागि नेपाल आएको बताईन्। उनको यो डेब्यु फिचर फिल्म हो।
‘फिल्मलाई लिएर निकै उत्साहित छु। अष्ट्रेलियामा भएको विशेष शोमा पनि दर्शकले असाध्यै मन पराइदिनु भएको थियो’,उनले खुशी हुँदै भनिन्,‘फिल्म रिलिजपछि नेपालका दर्शकले पनि मन पराइदिनुहुन्छ भन्नेमा विश्वास छ।’
फिल्ममा आर.ए सुरज पौडेल र विनिता कार्कीका अलवा नीर शाह, गौरी मल्ल,राजन कुँवर, पूजा चौधरी, आश्मा अधिकारी, मस्तानी, बिमला खत्री, गणेश बुढाथोकी, म्याक्स बाबू , कृष्ण थापा, र नवीन घायल लगायतका कलाकारको अभिनय रहेको छ। विशेष भूमिकामा रविन्द्र खड्का, उत्तम के.सी., र दिक्पाल कार्की देखिने छन् । यो फिल्मलाई विदेश प्रदर्शन अधिकार धमाधम बिक्री भइरहेको छ। केहि साताअघि मात्रै जापानमा फिल्म वितरण गर्दै आएको युना डिजिटलले यो फिल्मको प्रदर्शन अधिकार खरिद गरेको थियो।
यस फिल्मका प्रस्तुतकर्ता रञ्जित साह र सन्तोष तिवारी हुन् भने निर्माता लक्ष्मण सापकोटा र प्रदीप दाहाल हुन् । गणेश बुढाथोकीले लेखन तथा बन्दे प्रसादले सम्पादन गरेका यो फिल्मको छायांकन सौरभ सायमी र सौरभ लामाले गरेका हुन्। वितरणको जिम्मा आर.आर. फिल्म्सले लिएको छ। स्मरण रहोस्,यो फिल्म निर्देशक शोभित बस्नेतको दश वर्षपछिको कमब्याक हो।
