ब्युटी न्युज नेपाल
काठमाडौँ, २९ कात्तिक
नेपाली चलचित्र ‘हर्ष’ निर्माण टिम प्रचारको लागि चितवन पुगेको छ । मंसिर १२ गतेबाट देशव्यापी प्रदर्शनमा आउने सिनेमाकी निर्देशक एकता पौडेलको गृहनगर समेत यही हो । त्यसैले पनि उनी चितवनमा सञ्चालीत विभिन्न स्कुल, कलेजदेखि मेला महोत्सवसम्म पुगेर सिनेमाको व्यापक प्रचार गर्दैछिन् ।
यो सिनेमाको टिमले आज विहान चितवनमा पत्रकार भेटघाट कार्यक्रम गरेको थियो । त्यसलगत्तै ग्लोरियस एकेडेमी स्कुल पुगेर विद्यार्थीलाई सिनेमाको बारेमा जानकारी दिएको थियो । आजै सिनेमाको टिम खेलकुद तथा वृहत व्यापारिक महोत्सव २०८२ मा पुगेर दर्शकसँग भेटघाट गर्नेछ ।
निर्देशक एकता पौडेल, कलाकारहरु वर्षा राउत, सन्तोष पन्त, साइमन वादी र कोरियोग्राफर सुनिल क्षेत्रीको लगायत चितवन पुगेर सिनेमाको बारेमा जानकारी दिएका हुन् ।
चितवनमा आयोजित पत्रकार भेटघाट कार्यक्रममा डेव्यु निर्देशक एकता पौडेलले आफु चितवनको चेली भएकाले ‘हर्ष’ले चितवनवासीको माया पाउने बताइन् । ‘मैले धेरै मेहनत गरेर सिनेमा निर्माण गरेकाले सवैको साथ र सहयोग पाउने अपेक्षा छ । यो सिनेमाकी मुख्य अभिनेत्री वर्षा राउतले ‘हर्ष’ एउटा पारिवारिक भएकाले सवैले मन पराउने विश्वास व्यक्त गरिन् ।
चितवनमा नै सम्पूर्ण छायांकन भएको सिनेमा ‘हर्ष’ निर्देशक एकता पौडेल स्वर्गिय निर्देशक शिव रेग्मीकी भान्जी हुन् । न्यूयोर्क फिल्म एकेडेमीमा सिनेमा मेकिङ अध्ययन तथा आमसंचारमा स्नातक र व्यवस्थापन तथा नेतृत्व विषयमा स्नातकोत्तर गरेकी निर्देशक पौडेलले यसअघि केही छोटा सिनेमा समेत निर्माण गरेकी छन् ।
यो चलचित्रमा खगेन्द्र र वर्षासहित निर शाह, सन्तोष पन्त, शर्मिला मल्ल, माओत्से गुरुङ, विशाल पहाडी, निमा पाण्डे, लुनिभा तुलाधर, अंशु महर्जन, रेनु प्रधान, सुवर्ण थापा, श्रृष्टि महर्जन, सिर्जना नापित र बालकलाकार साइमन वादीको अभिनय छ ।
अष्टलक्ष्मी प्रोडक्सन्स् र ई–प्राईम मुभिजको ब्यानरमा निर्माण भएको सिनेमाको कथा स्वयं निर्देशक पौडेलको हो । प्रशन्न पौडेल र विकास पौडेल निर्माता तथा हिक्मत चोखाल कार्यकारी निर्माता रहेको सिनेमाका प्रोडक्सन म्यानेजर इश्वर घिमिरे, मुख्य सहायक निर्देशक कुलदीप शर्मा हुन् । आलोक शुक्लाको छयांकन, समीर र हिमाल, वसन्त सापकोटा तथा एलिश कार्काको संगीत, लोकेश बज्राचार्यको सम्पादन तथा सुनिल क्षेत्री र निर्देशक पौडेलको कोरियोग्राफी सिनेमामा छ ।
