भिडियोमा आयो सविनको ‘मनका कुरा’


ब्युटी न्युज नेपाल
काठमाडौँ, १५ भदौ

गायक सविन श्रेष्ठले आफ्नो स्वरमा नयाँ गीत ‘मनका कुरा’ को भिडियो दर्शकमाझ ल्याएका छन् । यो गीतलाई सविनले नै लेखेका हुन भने संगीत पनि उनकै हो । गीतमा मिक्सिङ तथा मास्टरिङ गोपाल रसाइलीले गरेका छन् ।

गीतको भिडियोमा सुजन जिम्बा र दिप्शा कार्कीको अभिनय छ । गीतमा खुसी खोज्दाखोज्दै हरेस खाएको प्रेमीको कथा छ । माया पाउन संघर्ष गर्दागर्दै थाकेको प्रेमीको कथालाई गीतले समेटेको छ ।

एक्लिएको जिन्दगीमा मनको बह पोख्ने मानिस पनि नहुँदा उदासिएको प्रेमीको कथा भन्ने गीतले आफ्नो आँखैअगाडि उजाडिएको प्रेमको कुरा छ । प्रेम र धोकाको वरिपरि गीत घुमेको छ । सविन प्रायः बिछोडिएको प्रेमको वरिपरि रहेका गीत लेख्ने र गाउँने गर्छन् ।

भिडियो निर्देशन दिमेश श्रेष्ठले गरेका छन् । संकल्प भुजेलले खिचेको भिडियो सम्पादन भुपेन्द्र अधिकारीले गरेका छन् । भिडियो कन्सेप्ट पनि निर्देशक स्वयंको रहेको छ ।