ब्युटी न्युज नेपाल
काठमाडौँ, ३ साउन
थुप्रै चर्चित गीतहरु बजारमा ल्याई सकेका अग्रज गायक गणेश थापाले आफ्नो स्वरमा नयाँ आधुनिक गीत ‘आँखै आँखाको इशारा होकी… ’ को भिडियो दर्शकमाझ ल्याएका छन् । यो गीतको भिडियोलाई उनले आफ्नै अफिसियल च्यानल ‘गणेश थापा युट्युव च्यानल’बाट हिजो सार्वजनिक गरेका हुन् ।
यो गीतलाई लोकप्रिय गायक एवम् संगीतकार नरेन्द्र प्यासीले संगीत गरेका हुन् । गीतको शब्द रचना सुन्दर पन्तको हो । पन्तको रचनामा यस अघि पनि आधा दर्जन गीत गणेशले आफ्नो स्वरमा रेकर्ड गरिसकेका छन् ।
यो गीतमा गायक थापालाई गायिका मेलिना राईले युगल स्वरमा साथ दिएकी छिन् । गीतमा संगीत संयोजन बिनोद भुजेलको रहेको छ । फील स्टुडियोमा रेकर्ड गरिएको यो गीतलाई कुमार केसीले मिक्सिङ र मास्टरिङ गरेका हुन् ।
यो गीतको भिडियोमा अर्जुन खड्का र नग्मा श्रेष्ठको युगल अभिनय रहेको छ । जसमा यी दुईको प्रेम सम्बन्ध देखाईएको छ । भिडियोलाई विशाल थापाले छायांकन गरेका हुन् । जसमा सम्पादन तथा रंग संयोजन पनि अर्जुन खड्काकै रहेको छ ।
यो गीतको भिडियोलाई सवला खड्का थापाले निर्माण गरेकी हुन् । समीर राईको निर्माण व्यवस्थापन गरेको भिडियोलाई जीवन शाहीले निर्देशन गरेका हुन् ।
