ब्युटी न्युज नेपाल
काठमाडौँ, १४ साउन
नेपाली रंगमञ्चमा सक्रिय निर्देशक बीरेन्द्र हमालको संयोजनमा एक विशेष १५ दिने थिएटर कार्यशाला (अभिनय तथा निर्देशन) सुरु हुने भएको छ । अभिनय र निर्देशनमा रुचि राख्ने नयाँ पुस्तालाई लक्षित गरी आयोजना गरिने छ । यो कार्यशाला मिति भाद्र ३ देखि १८ गते सम्म काठमाडौंमा सुरु हुँदैछ । कार्यशालामा सहभागीहरूले अभिनयको आधारभूत सिद्धान्त, शरीर र आवाजको प्रयोग, संवाद प्रवाह, चरित्र निर्माण, दृश्य संरचना, रंगमञ्चीय निर्देशनको प्रक्रिया जस्ता महत्वपूर्ण पक्षहरूमा
सैद्धान्तिक तथा व्यवहारिक ज्ञान प्राप्त गर्नेछन्। बीरेन्द्र हमालले आफैं प्रमुख प्रशिक्षकका रूपमा कार्यशालाको नेतृत्व गर्नेछन् ।
बीरेन्द्र हमालका अनुसार थिएटर जीवन बुझ्ने र बुझाउने माध्यम हो। नयाँ पुस्तालाई अभिनय र निर्देशनको सही अभ्यास दिलाउने उद्देश्यले यो कार्यशाला सुरु गर्न लागिएको हो। उनले नेपाली रंगमञ्चमा थप ऊर्जा र अनुशासन ल्याउने उद्देश्यसहित यस्ता कार्यक्रमहरू आयोजना गर्न लागेको बताएका छन्।
कार्यशालामा सहभागी हुन चाहने इच्छुक व्यक्तिहरूका लागि दर्ता फारम नयाँ बानेश्वर स्थित कार्यालयमा उपलब्ध गराइएको छ । आयोजक टोलीले सीमित स्थान हुने भएकाले चाँडो दर्ता गर्न सबैलाई अनुरोध गरेको छ।
