ब्युटी न्युज नेपाल
काठमाडौँ,६ साउन
खिल बहादुर गुरुङको निर्देशन निर्माण भएको नेपाली चलचित्र रिमै यसअघि भदौ २७ गतेबाट प्रदर्शनमा आउने तयारीमा रहेको थियो तर एकाएक चलचित्रको रिलिज मिति परिवर्तन गरिएको छ । यो चलचित्र अब भदौ २० गतेबाट देशव्यापी प्रदर्शनमा आउनेछ । यसै बिच रिमैको टिजर सार्वजनिक गरिएको छ । मंगलबार सिनेमाको करिब २ मिनेट लामो टिजर सार्वजनिक गर्दै निर्माण टिमले सिनेमाको प्रदर्शन मिति समेत एक हप्ता अगाडी ल्याएको हो ।
टिजरमा ग्रामीण परिवेश, संस्कृति, प्रेम, पीडा र बदला मिसिएको कथावस्तु झल्काइएको छ । दयाहाङ राईको गम्भीर भूमिका, रिश्मा गुरुङको आत्मीय उपस्थिति, अर्पण थापाको रहस्यमय चरित्र र बुद्धि तामाङको गहिरो अभिनयले दर्शकको ध्यान खिच्न सफल भएको देखाइएको छ । गुरुङ संस्कारलाई विशेष रुपमा प्रस्तुत गरिएको टिजरले सिनेमाप्रति दर्शकमाझ उत्साह पैदा गर्ने विश्वास निर्माण टिमको छ ।
वीरवल घले कार्यकारी निर्माता रहेको सिनेमामा टिका गुरुङ, जित यात्री गुरुङ र दुन बहादुर घले निर्माता तथा बिनु गुरुङ, रोशन भट्टराई र राजेश घिमिरे सह–निर्माताको रुपमा रहेका छन् ।
उपेन्द्र सुब्बाको लेखन रहेको सिनेमा गोरखा सिरानचोक एण्ड लिगलिगकोट फिल्म्स् प्रालीको प्रस्तुती र रोटेपिङ इन्टरटेनमेन्टको सहकार्यमा निर्माण भएको हो ।
चलचित्रमा गौमाया गुरुङ, कविता आले मगर, माओत्से गुरुङ, पुस्कर गुरुङ, वीरमाया गुरुङ, वीरवल घले, डिवी गुरुङ, टेक गुरुङ र बालकलाकार असिम सुब्बा, प्रेस्टु गुरुङ र प्रश्ना राना मगर लगायतको अभिनय रहेको छ । दीपक शर्मा र थानेश्वर गौतमको संगीत रहेको यो चलचित्रमा किरण चाम्लिङ राई मुख्य सहायक निर्देशक, बिष्णु मैनाली प्रोडक्सन म्यानेजर र मित्र डि गुरुङको सम्पादन रहेको छ । जसमा शैलेन्द्र ध्वज कार्कीले छायांकन गरेका हुन् ।
