ब्युटी न्युज नेपाल
काठमाडौं, २१ चैत
पछिल्लो समय अमेरिकामा रहेर संगीत सृजना गर्दै आएको भुवन सुप्तिहाङ राईले आफ्नो संगीतमा नयाँ गीत ‘तीन तारा तीन तिर…’को भिडियो बजारमा ल्याएका छन् । यो गीत अस्मिता अधिकारी र रोम नाम्जालीको स्वरमा रेकर्ड भएको छ । गीतलाई अग्रज गीतकार आनन्द अधिकारीले लेखेका हुन् । गीतमा महाराज थापाको संगीत संयोजन रहेको छ ।
यो गीतबारे संगीतकार भुवनले ब्युटी न्युज नेपालसँग भने,‘गीत निकै कर्णप्रिय बनेको छ । यसै साता रिलिज गरिएको यो गीतले दर्शकबाट राम्रो प्रतिक्रिया पाएको छ र दर्शकको मायाँले गर्दा भिडियोले एक मिलियन भ्युज पनि पाईसकेको छ ।’
यो गीतको भिडियोलाई रोलेक्स इन्टरटेनमेन्टबाट रिलिज गरिएको छ । भिडियोमा अभिनेता बुद्धी तामाङ र मोडल रजनी गुरुङ (मँगली)ले अभिनय गरेका छन् । उनीहरुबीच कबड्डी प्रतिस्पर्धासँगै प्रेम सम्बन्ध यो भिडियोमा देखाईएको छ ।
उत्तम हुमागाईंको छायाँकन रहेको यो गीतको भिडियोलाई निकेश खड्काले निर्देशन गरेका हुन् । भिडियो हास्यप्रधान बनाईएको भए पनि गीत माधुर्य रहेको छ । राज किङ वाईवाले कोरियोग्राफी गरेको यो भिडियोलाई विकास धमलाले सम्पादन तथा रँग सँयोजन गरेका हुन् ।
