ब्युटी न्युज नेपाल
काठमाडौं, १४ फागुन
नेपालको सँसद भवन भित्रै आन्दोलनकारीहरु प्रवेश गरेपछि अहिले नयाँ बानेश्वरस्थित संसद् भवनको सुरक्षार्थ खटिएका प्रहरी निरीक्षकसहितको ३२ जना टोलीको त्यहाँको जिम्मेवारी खोसिएको छ । प्रहरी प्रधान कार्यालय, नक्सालले जिम्मेवारी निर्वाह गर्न नसकेको भन्दै ति सबैजनालाई एकैसाथ जिम्मेवारीबाट हटाएको छ । जबरजस्ती सँसद भवनभित्र छिर्ने ४९ जना लघुवित्त पीडितलाई नियन्त्रणमा लिएको छ ।
प्रहरीलाई चक्मा दिएर आज दिउँसो लघुवित्तका ऋणीहरुको टोली संसद् भवन परिसरभित्र प्रवेश गरका थिए ।
देशभरका लघुवित्तपीडितहरू केही दिनदेखि काठमाडौंमा प्रदर्शन गरिरहेका छन् । उनीहरूले सोमबार दिउँसो संसद भवन परिसरमा नाराबाजी गरेका थिए । सोही क्रममा आन्दोलनकारीहरु सँसद भवन छिरेपछि त्यहाँ एक प्रकारको हँगामा नै भयो । अन्तत गृहमन्त्रीले नै यो बिषयमा प्रहरी प्रमुखसँग सोधपुछ गरेपछि संसद् भवन परिसरमा खटिएको सुरक्षा टोलीलाई हटाइएको हो ।
यस्तो घटना भएपछि तत्कालै घटनाबारे उपप्रधान तथा गृहमन्त्री नारायणकाजी श्रेष्ठले सबै सुरक्षा निकायका प्रमुख र गृहमन्त्रालयका उच्च अधिकारीहरूसँग सोधपुछ गरेका छन् ।
उनले काठमाडौंका सबै सुरक्षा प्रमुखसहितलाई मन्त्रालयमा बोलाएर घटनाबारे जानकारी लिएका हुन् । नेपाल प्रहरी र सशस्त्र प्रहरी महानिरीक्षक, काठमाडौं जिल्ला प्रहरी प्रमुख, काठमाडौंका प्रमुख जिल्ला अधिकारी, मन्त्रालयको शान्ति सुरक्षा महाशाखा प्रमुखलगायतका अधिकारीहरूलाई गृहमन्त्री श्रेष्ठले आकस्मिक रूपमा मन्त्रालयमा डाकेका हुन् ।
उनीहरूलाई मन्त्री श्रेष्ठले गम्भीर कमजोरी कसरी भयो भनेर प्रश्न गरेका छन् । गृहमन्त्रीको सोधपुछपछि इन्स्पेक्टरसहित ३२ जनालाई त्यहाँबाट हटाएर उनीहरुको ठाउँमा अर्को टिम पठाइसकिएको प्रहरी प्रधान कार्यालय स्रोतले जनाएको छ ।
सोमबार दिउँसो भएको घटनाबारे छानबिन गर्न उपत्यका प्रहरी कार्यालय, रानीपोखरीले एसएसपी दिनेशराज मैनालीको नेतृत्वमा ३ सदस्यीय छानबिन समिति बनाइसकेको छ । समितिमा काठमाडौं प्रहरीका एसपी नवराज अधिकारी र उपत्यका प्रहरी कार्यालय, रानीपोखरीका डीएसपी दिनेश घिमिरे सदस्य छन् ।
