ब्युटी न्युज नेपाल
काठमाडौं, १७ मँसिर
निदेृशक विनोद पौडेलले नयाँ चलचित्रको पोष्टर र नाम सार्वजनिक गरेका छन् । नेपालीमा भूठान र अंग्रेजीमा“द वल्र्डस् ह्याप्पिएस्ट म्यान”नाम रहेको यो चलचित्रको मुख्य भूमिकामा अभिनेता हरिवंश आचार्यका साथै दयाहाङ राई, जोयस पाण्डेय, अनुराधा मजुमदार, पूजा चन्दलामा, ऋचा घिमिरे, अदिती प्याकुरेल, टम क्रेन, विमल सुवेदी, कौशिला खनाल कर्माचार्य अनुवन्धित भएका छन् । यो चलचित्रमा हलिउडका एक नामुदकलाकारलाई पनि अनुवन्ध गर्न लागिएको छ तर हलिउडमा चलिरहेको फिल्मकर्मीहरुको आन्दोलन भर्खरै मात्र सकिएकोले केही समयमा टुंगो लाग्ने कुरा निर्माता मध्यका एक राजेन्द्र ठकुराठीले बताएका छन् । राजेन्द्र ठकुराठी हलिउड सिनेमाका एक प्रख्यात नाम हुन् । उनले अस्कर एकेडेमी अवार्डमा छानिएका सहित ५० फिल्ममा सहकार्य गरिसकेका छन् ।
भुटानदेखि भारत,नेपालहुँदै अहिले अमेरिकामा बसोवास गरिरहेका भुटानीहरुको देशप्रेम र जीवनयात्राको कथा समेटेर बन्न लागेको यस चलचित्र भूठान (द वल्र्डस् ह्यापिएस्ट म्यान्) सन् २०१९ मा बुसान फिल्म फेस्टिभलको स्कृप्ट पिचिङ्गमा समेत छानिएको थियो ।
विश्वका हरेक देशले आत्मसात गर्ने कथा, राम्रो लेखन र यस चलचित्रमार्फत नेपालअन्तर्राष्ट्रिय बजारमा जानसक्ने सुझाव आएपछि, विभिन्न देशका अन्तर्राष्ट्रिय समुहहरु यसमा हातेमालो गर्न आए । यो दक्षिण एसियाको कथा भएको र भू–राजनीति पनि जोडिएको हुनाले मुख्य भूभिकामा भारतका प्रसिद्घ कलाकारहरु राख्ने गरी उनीहरुको छलफल भई सम्झौता पनि भएको थियो ।
यसमा नसिरुद्घिन शाह, आदिल हुसेन, अनुपम खेर, प्रसिद्घ साउण्ड डिजाइजनर विश्वदीप चटर्जी, ए. आर रहमान तथा चीन, अमेरीका र बेलायतबाट समेत कलाकाहरु जोडिने पक्का भएको थियो । अनुपम खेरले, यस्तो राम्रो स्कृप्ट धेरै वर्षमा पढ्न पाएको भनी मुख्य भुमिकामा कम पारिश्रमिकमा पनि आफू काम गर्न एकदम रुचि भएको जनाएपछि उनीलगायत केही कलाकारहरुसग कानुनी रुपमै संझौताभयो र पहिलो किस्ता परिश्रमिक पनि दिईयो । अनुपम खेरले, “द फिल्म इज लाइक अ क्लासिकल हलिउड”भनेका थिए । अनुपम खेर लगायत अन्य भारतीय कलाकारलाई फिल्मसम्म जोड्ने काम नेपाली नाट्य निर्देशक विमल सुवेदीले गरेका थिए । विमलले यो चलचित्रमा निर्देशक पौडेललाई क्रियटिभ पाटोहरुमा सहयोग गरिरहेका छन् । तर जब विनोद, विमल र मुख्य पात्र अनुपम खेर स्कृप्ट रिडिङ सेसनमा वस्न थाले तब विनोदलाई अनुपम खेरले चरित्र र कथावस्तुलाइ लिएर अलि बढी क्रियटिभ हस्तक्षप गरेको अनुभुति भयो ।
अनुपम खेर उनको चरित्र अलिकति बलिउडको चलनचल्तीको मान्यता अनुरुप एडप्ट गरी आफ्नो चरित्रलाई लिएर नयां दृष्टिकोण दिन चाहन्थे । तर निर्देशक विनोद भने यो चलचित्र भारतीय फमुर्ला चलचित्र हेर्ने दर्शकको लागि मात्र नभएर विश्वबजारका लागि भएकोले बलिउड दर्शकको रुचिलाई मात्र ध्यान दिएर, कथाकोे आत्मा र उक्त चरित्रको गहिराईमा सम्झोता गर्नाले चलचित्रको दर्शनको लय बिग्रने हुँदा बरु सम्झौताको समयमा दिईएको पहिलो किस्ता वापतको रकम क्षतिपूर्ति स्वरुप अनुपम खेरवाट फिर्ता नलिने र पुनःभविष्यमा सहकार्य गर्ने आपसी समझदारी सहित अनुपखेर सँगको यात्रा टुंगियो । अहिले मुख्य भूमिकामा हरिवंश आचार्यसहित नेपाल, अमेरिका र भारत सहितको समूह मिलेर चलचित्रको पूर्व तयारीमा जुटेको छ ।
यस चलचित्रमा सन् २०१७ मा अस्कर अवार्ड जितेका निर्माता स्टार झाउ पनि एसोसियट निर्माताकोे रुपमा जोडिएका छन् । यस चलचित्रको प्रमुख निर्मातामा राजेन्द्र ठकुराठी, अमिताभ जोशी र चलचित्र बुलबुलकै निर्माता अविरल थापा रहनेछन् । साथै कार्यकारी निर्मातामा एलएन अधिकारी र कौशिला खनाल कर्माचार्य छन् भने शैलेश मैनाली, दिपक दस्नामी, मनोरथ खनाल, रविन पोख्रेल, प्रदीप शर्मा (बडाईं) ,राजु पौडेल, संजीवभार श्रेष्ठ, नवराज पराजुलीको सह निर्माण रहनेछ । चलचित्रको सम्पूर्ण छायाँकन अमेरिकाको ओहायो राज्यमा हुनेछ भने यस चलचित्र नेपाली एवं अंग्रेजी भाषामा निर्माण हुनेछ । चलचित्रको छायाँकन सन् २०२४ को अन्तसम्म सकेर सन् २०२५ मा प्रदर्शनमा आइसक्नेछ ।
चलचित्रमा सुसन प्रजापतिको छायांकन, अन्जय खड्काको सम्पादन, डिकेश खडगी शाहीको ध्वनि, सूर्य शाहीको कास्टिङ्ग, उज्वल श्रेष्ठको पब्लिसिटी डिजाइन, विमल सुवेदीको प्रोडक्सन डिजाइन, बलिउडका प्रख्यात कला निर्देशक अन्जन गजुरेलको कला निर्देशन रहनेछ । किर्तना बाँस्कोटा, एलि वोहोरा, विशाल डोटेल, समुन्द्र राज घिमिरेले निर्देशनमा सहयोग गर्नेछन् ।
