ब्युटी न्युज नेपाल
काठमाडौं, १२ असोज
महानगरी प्रहरी बृत्त नयाँ बानेश्वरबाट प्रहरीले छलफलको लागि पटक पटक बोलाउँदा पनि अनमोल केसी प्रहरीकोमा नगएपछि उनी शुक्रबार साँझ पक्राउ परेका छन् । आपराधिक विश्वासघात गरेको आरोपमा अभिनेता अनमोल केसीलाई उपत्यका अपराध अनुसन्धान कार्यालय, काठमाडौंको टोलीले पक्राउ गरेको हो । केसीलाई भक्तपुरको साँगाबाट पक्राउ गरिएको सो कार्यालयका एसपी रवीन्द्र रेग्मीले बताएका छन् ।
अनमोलले दुई महिना अघि चलचित्र रावायणमा मुख्य भूमिकाको लागि १० लाख रुपैयाँ पेश्की लिएर सम्झौता गरेका थिए । सो फिल्मको छायाँकनको तयारी गर्दै गर्दा यो साता अनमोलले समय दिएनन् र स्कृप्ट कमजोर भयो भन्दै यो फिल्ममा नखेल्ने बताए । त्यसपछि रावायणको टिमले केसीविरुद्ध आपराधिक विश्वासघातको कसुरमा किटानी जाहेरी दिएका थिए ।
अनमोललाई भक्तपुरको साँगाबाट साँझ साढे ५ बजे नियन्त्रणमा लिइएको र थप अनुसन्धानका लागि हिरासतमा लिइएको प्रवक्ता रेग्मीले बताए । अब अनमोल कम्तीमा आईतबारसम्म प्रहरी हिरासतमा रहने छन् ।
निर्माण कम्पनी सुदर्शन थापा प्रोडक्सन प्रालिको तर्फबाट सुप्रिया भन्ने चन्द्रकला कटुवालले उजुरी दिएकी थिइन् । उक्त उजुरीको आधारमा अनमोलविरुद्ध केही दिनअघि पक्राउ पुर्जी जारी भएको रेग्मीले जानकारी दिए । प्रहरीले खोजी कार्य गर्दा सूचनाको आधारमा साँगाबाट पक्राउ गरिएको हो ।
उपत्यका अपराध अनुसन्धान कार्यालयका प्रमुख एसएसपी सोमेन्द्रसिंह राठौरका अनुसार, केसीले फिल्म खेल्छु भनेर बैंक ट्रान्सफरमार्फत १० लाख रुपैयाँ लिएका थिए । तर, फिल्म खेल्न मानेका थिएनन् । फिल्मको सम्पूर्ण तयारी गरेर छायाँकनमा जान लाग्दा एक्कासी अनमोलले फिल्म नखेल्ने भनेपछि आफुहरुलाई कम्तिमा एक करोडा १५ लाख रुपैयाँ विश्वासघात भएको पनि निर्माता निर्देशक सुदर्शन थापाले बताएका छन् ।
