फुटबल खेल्दै आकाशे खेतीको प्रचार

ब्युटी न्युज नेपाल
काठमाडौं, २१ फागुन

चलचित्र ‘आकासे खेती’ यही २७ फागुनबाट रिलिज हुँदैछ । यो फिल्मको निर्माण युनिट फिल्मको प्रचारका क्रममा फुटबल खेलमा उत्रिएको छ । शनिबार काठमाडौंका मन्डिखाटार स्थित फुटबल ग्राउण्डमा फिल्मका कलाकार तथा निर्माण युनिटले अर्को फिल्म ‘लप्पन छप्पन २’ युनिटसँग फुटबल खेले । खेलमा ‘आकासे खेती’को तर्फबाट निर्देशक उदय सुब्बा, अभिनेता गौरव पहाडीलगायत सहभागी भएका थिए भने ‘लप्पन छप्पन २’का पनि कलाकार तथा निर्माण युनिट सहभागी थिए ।

‘मैत्रीपूर्ण फुटबलमा हामीले फिल्मको पोस्टर अङ्कित टिसर्ट समेत लगाएका थियौ’ निर्देशक सुब्बाले भने ‘फुटबल खेलको अलावा त्यहाँ उपस्थित दर्शकमाझ हामीले फिल्मको विभिन्न पक्षबारे जानकारी दियौ ।’ कार्यक्रममा बक्स अफिस मिडियाले फिल्मका निर्देशक सुब्बा सहित सहभागी दुवै तर्फका फिल्म युनिटलाई ‘मायाको चिनो’ समेत वितरण गरेको थियो ।

कलाकार विल्सन बिक्रमको सम्बाद रहेको आकाशे खेतीमा बिक्रम डिसीको छायांकन, सुजन बडालको सम्पादन, राजु किराँतीको द्वन्द्व, रामजी लामिछाने र राजिव सिंहको नृत्य, विकाश चौधरी र बादल लिब्बुको संगीत छ । फिल्मको निर्देशन उदय सुब्बाले गरेका हुन् । ‘लप्पन छप्पन २’ शुक्रबारबाट प्रदर्शनमा आएको फिल्म हो । फिल्ममा सौगात मल्ल, अर्पण थापा अनुप बिक्रम लगायतको अभिनय छ ।

आकासे खेती’ युवाहरूको विना मिहिनेत पैसा कमाउने सपना र तिब्वतियन शरणार्थीको कथामा बनेको फिल्म हो । गौरव, विल्सन, बुद्धिका अलावा नीता ढुंगाना, मरिश्का पोखरेल, रविन्द्र झा, जयनन्द लामा र शिशिर वाङ्देलको अभिनय फिल्ममा देख्न सकिन्छ । केदार उप्रेती, जीवन सुब्बा, राजेन्द्र चोङबाङ, दीलप्रकाश याक्सो निर्माता रहेको फिल्मको कथा निर्देशक उदय सुब्बा आफैंले तयार पारेका हुन् ।