ब्युटी न्युज नेपाल
काठमाडौं, १८ भदौ
बिहिबार पुलचोक क्षेत्रमा स्थानीयले रातो मछिन्द्रनाथको रथ तान्ने क्रममा प्रहरीसँग झडप गरेपछि जिल्ला प्रशासन कार्यालय ललितपुरले ललितपुरमा १९ भदौ शुक्रबार बिहान ४ बजेदेखि ललितपुरभरी कर्फ्यू आदेश जारी गरेको छ । स्थानीय प्रशासनले भोलि बिहान ४ बजेदेखि राति १० बजेसम्म ललितपुर क्षेत्रमा कर्फ्यू आदेश जारी गरेको हो।
सो आदेश उलँघन गरेर घर बाहिर निक्लने, भेला हुने र सुरक्षाकर्मीलाई अबरोध पुर्याउनेलाई गोली समेत प्रहार गर्न प्रहरीलाई जिल्ला प्रशासन कार्यालयले आदेश दिएको छ । साथै सबैलाई घरभित्रै बस्न पनि आदेश दिएको छ ।
जिल्ला प्रशासन कार्यालय ललितपुरमा प्रमुख जिल्ला अधिकारी, प्रहरी र स्थानीय जनप्रतिनिधिको बैठकले कर्फ्यू आदेश जारी गर्ने निर्णय गरे अनुसार जिल्ला प्रशासन कार्यालयले आदेश जारी गरेको जनाएको छ ।
ललितपुरका प्रमुख जिल्ला अधिकारी नारायण प्रसाद भट्टले अवस्था सामान्य बनाउन कर्फ्यू जारी गरिएको र रथलाई पुल्चोकबाट ७ सय मिटर अघिसम्म तान्ने र २६ गते बुङ्मति लैजाने निर्णय भएको नागरिकखबरलाई जानकारी दिए । यसैबीच बिहिबार अराजक क्रियाकलाप र प्रहरीमाथि हातपात गर्ने १० जनालाई प्रहरीले नियन्त्रणमा लिएको छ । उनीहरुलाई शान्ति सुरक्षामा खलल पुर्याएको अभियोगमा कारवाही गर्ने जनाईएको छ ।
