ब्युटी न्युज नेपाल
काठमाडौ ८, चैत
विश्व्यापी रुपमा कोभिड १९ कोरोना भाईरसको प्रभाव फैलिएको बेला बरिष्ट अभिनेता सन्तोष पन्तले भिडियो मार्फत कोरोना भाइरसबिरुद्धको अभियान अघि बढाएका छन् । भिडियोमा अभिनेता पन्तले नेपालमा अहिलेसम्म कोरोनाको महामारी नफैलिए पनि सुरक्षित रहन गर्नुपर्ने बिधिहरुबारे जानकारी दिएका छन् । उनले भिडियोमा साबुन पानीले हात धुने,सेनेटाइजर प्रयोग गर्ने, अत्याबश्यक काम नभएसम्म घरबाहिर ननिस्कने, भीडभाडमा नजाने लगायतका सावधानी अप्नाउन अपील गरेका छन् । उनले आफ्नो तर्फबाट रवि लामिछाने, दीपा श्री निरौला र दिनेश डीसीलाई पनि कोरोना भाइरसबाट जोगीन गर्नुपर्ने बिधि बारे जनमानसमा सन्देश पुर्याउन आग्रह गरेका छन् ।
उनको भिडियो सन्देश बैशाख १२ गतेलाई प्रदर्शन मिति तोकिएको ‘हिजो आजका कुरा’ फिल्म टिमले समाजीक संजालमा सार्वजनीक गरेको हो । ‘हिजो आजका कुरा’ का निर्देशक साकार पन्तले आफ्नो फिल्म र फिल्ममा संलग्न कलाकारको माध्यमबाट कोरोना भाइरस बारे सचेतना जगाउन अभियान थालेको बताए । उनले पहिलो चरणमा आफना पिताको भिडियो पोस्ट गरेको र क्रमश अन्य कलाकारको पनि भिडियो सन्देश जनमानसमा पुर्याइने जानकारी दिए ।
फिल्ममा सन्तोष पन्त, साकार पन्त, रमा थपलिया, केकी अधिकारी,ऋचा शर्मा,दिब्यदेव पन्त,रिमा बिश्वकर्मा,जयनन्द लामा,जेविका कार्की, रमेश अधिकारी, बिनय कुँइकेल,अनुष्का अधिकारी,निराजनप्रसाद अर्याल,सबिन शाक्यलगायतका कलाकारले अभिनय गरेका छन् ।
पन्त फिल्म प्रोडक्सनबाट निर्मित फिल्मको कार्यकारी निर्मातामा प्रतिभा पन्त,सह निर्मातामा बैकुण्ठप्रसाद उपाध्याय (अशोक) र सचितकुमार मिश्र छन् । रवि सायमीले खिचेको फिल्मको कथा सन्तोष पन्तको हो भने सन्दीप किस्नाको पटकथा छ ।
