ब्युटी न्युज नेपाल
काठमाडौं, १५ भदौ
आगामी ९ असोजमा काठमाडौंमा एक समारोहबीच प्रदान गरिने दोस्रो ‘सगरमाथा म्युजिक अवार्ड २०७६’ को उत्कृष्ट पाँचमा पर्न सफल सर्जक, कलाकार एवं प्राविधिकहरुलाई प्रमाणपत्र तथा मेडल प्रदान गरिएको छ ।
समारोहमा ४२ विधाका २ सय १० नोमिनिजलाई प्रमाणपत्र र मेडल वितरण गरिएको हो । काठमाडौंको बसुन्धराको यति इभेन्टसमा नेपाली चलचित्र क्षेत्रकी प्रथम नायिका भुवन थापा चन्दको प्रमुख आतिथ्यतामा उत्कृष्ट पाँचका नोमिनिजहरुलाई प्रमाणपत्र वितरण गरिएको हो । कार्यक्रममा वरिष्ठ पत्रकार शान्तिप्रिय, डब्बु क्षत्री, गीता अधिकारी, चलचित्र निर्देशक रमेश थापा, गायक सिताराम पोखरेलले प्रमाणपत्र प्रदान गरेका हुन् ।
सगरमाथा म्युजिक अवार्ड रेस्पोन्सिभ मिडिया प्रालिको आयोजनामा हुन लागेको हो । आयोजक समितिका अध्यक्ष मनोज थापाका अनुसार अवार्डको तयारीमा आयोजकपक्ष व्यस्त छ ।
यसैबीच यो अवार्ड प्रदान समारोहमा सङ्गीत पत्रकारिताको माध्यमबाट यस क्षेत्रको विकाश र विस्तारका लागि क्रियाशील ६ जना रङ्ग पत्रकारहरु समेत ‘सगरमाथा रंग पत्रकारिता सम्मान २०७६’ बाट सम्मानित हुने भएका छन् । यस वर्ष शान्तिप्रियलाई रंग पत्रकारिता रजत सम्मान प्रदान गरिने भएको छ भने राज श्रेष्ठ, तुलसी गिरी ‘भावुक’, विजय आवाज, कुवेर डंगोललाई रंग पत्रकारिता सम्मान र मनीष दाहाललाई रंग पत्रकारिता पुरस्कार प्रदान गरिने आयोजक मनोज थापाले जानकारी दिएका छन् ।
