ब्युटी न्युज नेपाल
काठमाडौं, १४ भदौं
पूर्व पोर्न स्टार तथा बलिउड अभिनेत्री सनी लियोनीलाई अभिनय गराएर चर्चामा रहेको नेपाली चलचित्र पासवर्ड यही २७ भदौ देखि मुलुकका सिनेमा हलमा आउँदैछ । फिल्मको प्रचारका लागि सनी २४ भदौमा काठमाडौं आउने छिन् ।
निर्माता अजित के आर थापाले दिएको जानकारी अनुसार चलचित्र पासवर्डको विदेशमा पनि रिलिज गरिने छ । नेपालको एक साता पछाडी एसिया, अमेरिका, अस्ट्रेलिया र युरोपका देशमा एकै दिन पासवर्ड रिलिज गरिने भएको छ ।
सम्राट बस्नेत निर्देशित यो एक्सन प्रधान सिनेमा हो । जसमा अनुपविक्रम शाही, विक्रम जोशी, सन्नी लियोनी, बुद्दि तामाङ, रविन्द्र झा, प्रविण खतिवडा, धिरेन शाक्य, लिजा सुनार, परि राना, छुल्ठिम गुरुङ, एभरेस्ट सुर्य बोहरालगायतका कलाकारको अभिनय छ ।
थापाका अनुसार सेप्टेम्बर २० अर्थात असोज ३ देखि १२ देशका विभिन्न २४ शहरमा प्रदर्शन हुनेछ । अमेरिकाको टेक्सास, क्यालिफोर्निया र कोलोराडोमा प्रदर्शन हुने सिनेमा भारतको दार्जि्लिङ, सिलिगुरी र सिक्किममा पनि रिलिज हुनेछ ।
यस्तै अस्ट्रेलियाको सिड्नी, मेलबर्न, ब्रिसबेन, क्यानबेरा, गोल्ड कोस्ट र पर्थ, युकेको लण्डन, जापानको टोकियो, योकोहामा र ओसाका, कोरियाको सियोल, युनाइटेड अरब इमिरेटको आबु धावी र दुबई, क्यानडाको क्युबेक सिटी, पोर्चुगलको लिस्बोन, पोल्याण्डको वर्स, जर्मनीको बर्लिन र मलेसियाको क्वालालम्पुरमा सिनेमा रिलिज फिक्स भएको छ ।
अंकित गौतमको कार्यकारी निर्माण रहेको सिनेमामा निर्माताको रुपमा अमित बस्नेत र हिराल जोशी छन् । भने, युकेको लागि कार्यकारी निर्माताको भूमिका मोहित छब्राले निभाएका छन् । अजित के.आर थापाको सह निर्माता रहेको यो फिल्मका लाइन प्रोड्युसर सनिश खकुरेल हुन् ।
सिनेमामा अर्जुन पोखरेलको संगीत, सम्राट बस्नेतकै एक्सन, अमरजीत सिंहको छायाँकन र सौरभ लामाको डिओपी छ । निर्देशक बस्नेत र महेश दवाडीको पटकथा रहेको सिनेमाको कथा सिमा गुरुङले लेखेकी छन् ।
