ब्युटी न्युज नेपाल
काठमाडौं, ३१ असार
शुक्रबारबाट मुलुकका ७३ ओटा सिनेमा हलमा प्रदर्शनमा आएको चलचित्र ‘सानो मन’को स्याड भर्सन गीतको भिडियो ‘कस्तो माया…?’ युट्युव मार्फत दर्शकमाझ आएको छ ।
यो गीतलाई निर्माण संस्थाको अफिसियल च्याटल हाईटेक इन्टरट्रेनमेन्टबाट रिलिज गरिएको हो । गीतमा निकिता थापाको एकल गायन छ । यो गीतमा सुयोग सोताङको शब्द र संगीत रहेको छ ।
चलचित्र सानो मनमा गायिकाको भूमिका निभाएकी अभिनेत्री शिल्पा मास्केले यो गीत गाएको भिडियोमा देख्न पाईन्छ । यो भिडियोमा अभिनेत्री शिल्पाले अभिनेता आयुष्मान देशराज जोशीसँग विताएको पल सम्झिएर भावुक हुँदै उनी स्टेजमा आफ्नो प्रस्तुती दिँदै देखिएकी छन् । फिल्ममा यो गीत कथावाचनको रुपमा प्रयोग गरिएको छ ।
‘सानो मन’ ले दर्शकबाट निकै राम्रो प्रतिक्रिया प्राप्त गरेको छ । फिल्म हेर्ने दर्शकले कलाकारको अभिनय र निर्देशकको कामको प्रशंसा गरेका छन् । निर्देशक सुयोग गुरुङ्गको कामलाई दर्शकले रुचाएका छन् । आयुष्मानको पनि अहिलेसम्मकै उत्कृष्ट अभिनय यो फिल्ममा रहेको छ ।
आयुष्मान र शिल्पासँगै यो चलचित्रमा सक्षम सुवेदी, गौरी मल्ल, विशाल पहारी, शिशिर वाङदेल, रश्मी भट्टसहितका कलाकारहरुको अभिनय रहेको छ । फिल्मको छायांकन पक्ष प्रशंसनिय छ ।
साँगीतिक प्रेम कथामा आधारित यो चलचित्र पात्रको मनोविज्ञानका आरोह अबरोहमा आधारित छ । आयुष्मान र शिल्पाको प्रेमले दर्शकलाई अपनत्व महसुस गराउँछ । फिल्मका केही संवादहरु निकै मर्मस्पर्शी र सजिलै जिब्रोमा झुण्डिने खालका छन् ।
ओ.पि.जी फिल्मस्, ए प्लस इन्टरटेन्मेन्ट र हाई टेक इन्टरटेन्मेन्टले संयुक्त लगानी गरेको यो फिल्मका निर्माताहरू योगेश गुरुङ, राजीव श्रेष्ठ, रमेश के. मित्तल र राजेन्द्र मानन्धर हुन् । रित बोहरा मुख्य सहायक निर्देशक हुन् भने प्रोडक्सन म्याजेनर यम प्रसाद ओली हुन् । आलोक शुक्लाको छायाँकन, सुयोग गुरुङ र मिलन श्रेष्ठको सम्पादन, समिर सुनुवार र निर्देशक गुरुङको संयुक्त लेखन यसमा रहेको छ ।
https://www.youtube.com/watch?v=lEFO-TaYlr0
