ब्युटी न्युज नेपाल
काठमाडौं २१ पुष

काठमाडौंको धुम्बाराही स्थिति ‘धुम्बाराही लायन बृद्धाश्रम नेपाल’मा आश्रीत जेष्ठ नागरिकलाई राष्ट्रिय श्रष्टा तथा प्रस्तोता प्रतिष्ठानको तर्फबाट सो प्रतिष्ठानका पदाधिकारीले सहयोग गरेका छन् । प्रतिष्ठानका तर्फबाट बृद्धाश्रममा आश्रीत जेष्ठ नागरिकलाई न्यानो कपडाको रुपमा कम्बल सहित खाद्यान्न, फलफुल र नगद समेत सहयोग हस्तान्तरण गरिएको छ ।

प्रतिष्ठानका अध्यक्ष राजेन्द्र बजगाईले सामाजिक उत्तरदायित्व अन्तर्गत यो सहयोग प्रदान गरेको बताएका छन्,‘काठमाडौंमा दिन प्रतिदिन बढिरहेको चिसोबाट बुद्ध उमेरका बुबा–आमालाई सुरक्षित गर्न सकिन्छ कि भन्ने पवित्र भावनानुरुप उक्त सहयोग गरिएको हो ।’
कला क्षेत्रका बिभिन्न बिद्यामा आवद्ध संगीतकर्मीको हक–हितका लागि संस्था स्थापना भएपनि सामाजिक कार्यमा समेत सक्रिय रहने उद्देश्य अनुसार आफुहरुले पहिलो काम नै बृद्धाश्रमलाई सहयोग गरेको प्रतिष्ठानका महाचिव दिपक शर्माले बताए ।

कला क्षेत्रका बिभिन्न बिधामा सक्रिय श्रष्टा तथा प्रस्तोताहरु आवद्ध रहेको एकेडेमीले उक्त अवसरमा बिबिध सांस्कृतिक प्रस्तुतिहरु समेत प्रस्तुत गरेको छ । कलाकारहरुले भजन गाउन थालेपनि त्यहाँ आश्रीत बुबाआमाहरुले नाचगान गर्दै रमाइलो गरेका थिए ।

९ वर्ष अघि स्थापना भएको बृद्धाश्रममा हाल १२ जनाले आश्रय लिइरहेका छन् । आमाहरुका लागि मात्र भनेर सञ्चालन गरिएको आश्रममा हाल भने एकजना बुबालाई पनि आश्रय दिइएको सञ्चालक धनराज भडेलले जनाएका छन् । १३ वर्षकै उमेरमा आमा गुमाएका धनराजले आमा गणेश कुमारीको सम्झनामा यो बृद्धाश्रम सञ्चालन गरेका हुन् ।

कलाकारहरु आएर नाचगान सहित आमाबुबाहरुलाई मनोरञ्जन समेत प्रदान गरेको भन्दै उनले बुद्ध बुबाआमाको ओठमा खुशी ल्याउने यस्तो कार्यले आफुलाई थप उर्जा मिलेको धनराजले बताए ।

सहयोग हस्तान्तरणका लागि प्रतिष्ठानका अध्यक्ष बजगाईसहित महासचिव शर्मा, सचिव सुजाता केसी, कोषध्यक्ष नारायण थापा, सदस्यहरु रिता केसी, बेनिशा पौडेल, माइकल चन्द, मनोज परियार, सविन सुबेदी, प्रतिक्षा काफ्ले, उक्तम अधिकारी, भद्र ओली, शिलन लम्साल, पुस्कर सुनुवारलगायतको त्यहाँ पुगेका थिए ।