ब्युटी न्युज नेपाल
सुर्खेत, २० जेठ
हराएको १० दिनपछि रुकुम पश्चिमको भेरी नगरपालिका–११ का १८ वर्षीय गोविन्द शाहीको शव भेरी नदीमा मंगलबार फेला परेको छ । रुकुम पश्चिम घटनामा उनको शब फेलापरेसँगै मृत्यु हुनेको संख्या ६ पुगेको हो । शसस्त्र प्रहरी बलको गोताखोरले उनीहरुको शब खोजी गरेको थियो ।
चौरजहारीमा अन्तरजातीय प्रेम विवाह गर्न खोज्दा भएको घटनामा परी मृत्यु हुनेको संख्या ६ पुगेको हो । आफ्ना साथी नवराज विकाका लागि उनी जाजरकोटाबाट चौरजहारी केटी भगाउन गएका हुन् ।
जाजरकोटका डीएसपी किशोर श्रेष्ठका अनुसार शाहीको शव भेरी नगरपालिका–१२ स्थित भेरी नदीमा स्थानीयले फेला पारेको हो । उनीसँगै भेरी नदीमा फालिएको भनिएका सञ्जु विक, लोकेन्द्र सुनार, नवराज विक, गणेश बुढा र टीकाराम सुनारको शव यसअघि नै भेरी नदीमा फेला परेको थियो ।
घटनामा संलग्न रहेको आशंकामा १८ जनालाई नियन्त्रणमा लिएर आवश्यक अनुसन्धान गरिरहेको प्रहरीले जनाएको छ । घटनाबारे सत्य, तथ्य र निष्पक्ष छानविन गर्न सरकारले गठन गरेको उच्चस्तरीय समितिले घटनास्थल पुगेर आवश्यक अनुसन्धान गरिरहेको छ ।
