ब्युटी न्युज नेपाल
काठमाडौं, १३ भदौ
यो दशैंलाई लक्षित गरेर २४ असोजमा रिलिजको घोषणासँगै चलचित्र ‘छ मायाँ छपक्कै’को पहिलो गीत जुनको जुनेली…को भिडियो युट्युवबाट रिलिज गरिएको छ । शुक्रबार बिहान रिलिज गरिएको भिडियोले रिलिज भएको १२ घन्टामा २ लाख ५० हजार भ्युज पाईसकेको छ । गीतलाई दर्शकले निकै मन पराएका छन् । लोक लयमा आधारित यो गीत कर्णप्रिय छ ।
सालको पात टपरी हुने…का गायक संगीतकार बसन्त थापाले यो गीतमा सँगीत गरेको हुन् । शब्द राजेन्द्र थापाको हो । गीतलाई बसन्त र मिना निरौलाले गाएका छन् । यो गीतबाट गायक बसन्तको चलचित्र संगीतमा डेब्यु सार्थक देखिने छ ।
दीपेन्द्र लामा निर्देिशत छ माया छपक्कैको यो गीतको भिडियोमा दीपकराज गिरी र केकी अधिकारीबीचको प्रेम सम्बन्ध स्थापित गर्न खोजिएको छ । गीतमा फिल्मका प्रमुख कलाकारहरु दीपकराज गिरी, जितु नेपाल, केदार घिमिरे, केकी अधिकारी र सुपुष्पा भट्ट छन् । जसमा जितु र सुपुष्पाको प्रेम, बुद्धि तामाङ र रजनी गुरुङको प्रेमसम्बन्ध पनि देखाईएको छ ।
सिन्धुलीको सितलपाटी क्षेत्रमा रोपाईको भव्य दृष्यसँगै त्यहाँका सुन्दरता र संस्कृतिलाई यो गीति दृष्यमा समेटिएको छ ।
आमा सुरस्वती मुभिज, रोहित अधिकारी फिल्मस् र आईएमईबीच सहकार्य भएर निर्माण भएको यस फिल्मका निर्माता रोहित अधिकारी, कार्यकारी निर्माता केदार प्रसाद घिमिरे हुन् ।
निर्देशक लामाकै कथा रहेको फिल्ममा दीपकराज गिरीको पटकथा, दीपकसँगै केदार घिमिरे, जितु नेपाल र अभिमन्यू निरवीको सम्बाद यसमा छ । रोशन श्रेष्ठको द्वन्द्व निर्देशन, दीपाश्री निरौलाको सल्लाहकार निर्देशन छ । जसमा हरि हुमागाईंको छायांकन, कविराज गहतराजको कोरियोग्राफी र विपिन मल्लको सम्पादन रहेको छ ।
